‘n Totale sonsverduistering vind plaas wanneer die maan tussen die son en die aarde beweeg en die son heeltemal blokkeer. Dit gebeur gemiddeld elke 18 maande iewers op aarde.

Hierdie jaar was dit Amerika se beurt. Die sogenaamde “pad van totaliteit”, dit wil sê, die pad waarlangs die maan die son heeltemal blokkeer, het oor stede soos Indianapolis, Dallas en San Antonio beweeg. ’n Gedeeltelike sonsverduistering was egter regoor die State sigbaar – van New York op die ooskus na Los Angeles op die weskus.

In 2017 kon ongeveer 12 miljoen mense die sonsverduistering van hulle huise af sien. Hierdie jaar word daar beraam dat daardie syfer op 32 miljoen staan. Hierdie jaar het dit ook twee keer so lank geduur in vergeleke met 2017, met ’n maksimum tyd van 4 minute en 28 sekondes. Temperature het ook tydens hierdie verskynsel met ongeveer 5ºC gedaal.

Sonsverduisterings is nie net pragtig om waar te neem nie, hulle is ook wonderlik vir navorsing. Volgens NASA het hierdie waarnemings bygedra tot die ontsyfering van die son se struktuur. Dit het bewyse gelewer van Einstein se teorie van algemene relatiwiteit en het selfs gehelp om ‘n nuwe element te ontdek!

Hierdie jaar se verduistering het wetenskaplikes toelaat om ’n deel van die son se atmosfeer – bekend as die korona – waar te neem, wat gewoonlik te flou is om te sien as gevolg van die son se helderheid.

Die volgende totale sonsverduistering sal in 2026 plaasvind. Dit sal sigbaar wees in Europa, Noord-Amerika en sommige dele van Afrika. Suid-Afrikaners sal egter tot 2030 moet wag vir hulle beurt.