“I am green team ‘till I die, I am green team ‘till I die …”
Saggies maar seker eggo dit nog deur die stoepe ná laas Vrydag se groot oorwinning vir die groen span.
Op Vrydag 20 Oktober het die leerders van Jim Fouché 2024 hulle stemme laat hoor. Ná die matriekgroet was daar baie hoop en blydskap onder die ander grade. 2024 se rasieleiers is in twee groepe (Wit en Groen) opgedeel, en die res van die skool ook volgens hulle vanne.
Na net één week se oefening was die spanne gereed om te kompeteer. Die dag het afgeskop met optogte van albei spanne. Die wit span het begin en tweede die groen span.
Albei dansies was uniek en vol gees. 2022 se rasieleiers het kom beoordeel watter span het wat dit vat om die kroon te dra. Na die optogte het die grade in spanverband teen mekaar meegeding. Dit het aanvanklik baie goed gelyk vir die wit span, maar die graad 11’s het die groen span gehelp om die beker te neem. En deur dié oorwinning het die groen span die speletjiebeker verower. Uiteindelik het die groen span ook met die Geesbeker weggestap!
“Die Bokke se kleur het ons deurgedra,” sê een van die groenspanseuns. (Die Oester hoop dit voorspel net goeie dinge vir Saterdag se eindstryd.)
Met kompetisie, spanwerk en baie gees was die dag ’n reusesukses. Die geesdag van 2023 sal ons nooit vergeet nie!
0 Comments