Een van die sterre van hierdie gebeurtenis was Franco Deacon, wat ’n verdienstelike 6de plek behaal het in die Goue Tong-kategorie. Dit is ’n kategorie waar deelnemers slegs 5 minute voorbereidingstyd kry om ’n oortuigende toespraak voor te berei. Franco se prestasie dui op sy kreatiwiteit, vinnige denke, en die vermoë om ‘n gehoor (sonder voorbereiding) te boei.

Marlé van der Merwe het ’n indrukwekkende 7de plek verower in die onvoorbereide Graad 10-12-kategorie. Hierdie kompetisie vereis dat deelnemers in die oomblik ’n toespraak moet lewer oor ’n onbekende onderwerp, wat ’n groot vaardigheid in vinnige denke en spontane woorde vereis.

Lisa Botha, wat 8ste in die voorbereide Graad 10-kategorie gekom het, het bewys dat dit nie net oor spontaniteit gaan nie, maar ook oor die vermoë om ‘n deeglike, voorbereide toespraak te lewer wat gehore kan oortuig en beïndruk.Karla Visser, wat ‘n 11de plek in die Graad 11-Voorbereide kategorie behaal het, het getoon dat ’n liefde en talent vir redenaarskap nooit onderskat moet word nie.

Die groot wenner van die dag was Josua Deacon, graad 8-leerder, wat ‘n puik lándswye 1ste plek in die Onvoorbereide kategorie verower het – dit is ’n uitsonderlike prestasie! Josua se meesterlike vaardigheid om in die oomblik ‘n oortuigende toespraak te lewer, het aan hom die eer van landswye wenner besorg.  

Die naam “Oppie Tong Af” beskryf nie net die aard van die kompetisie nie, maar ook die gees daarvan. Hierdie kompetisie is ’n viering van spontane en voorbereide retoriek, waar jong mense hul talent en vermoëns kan toets en opskerp. 

Wat ’n voorreg was dit nie vir hierdie JF-leerders om JF op nasionale vlak te verteenwoordig nie!