“Voorsitter, dames en here,” hiermee ’n paar van Jim Fouché se redenaarsgebeure. Ek glo vas dat JF sprekers kweek wat elke kompetisie domineer, en bewys graag hierdie standpunt aan die hand van die volgende argumente.

2024 se voorbereide toespraak onderwerpe vir die juniors is kantlyn, meulsteen of boekmerk. Metafoor, visie of paradoks is die seniors s’n. Leerders moet in hierdie onderwerpe duidelike oortuigingsfaktore opsom in ’n 7 minuut lange toespraak. Hierdie verwagtinge skrik egter geen JF-leerder af nie. Vanjaar het JF ’n fenonemale 34 sprekers, en hulle lippe is aan die brand! Moenie sommer ’n argument met hulle begin nie; hulle is lús vir oorreed! Kom ek wys jou hoe presteer ons sprekers selfs al so vroeg in die jaar.

Die eerste redenaarskompetisie waaraan JF se leerders deelgeneem het, was Radikale Redenaars op 6 Maart 2024. Dit was ’n aanlynkompetisie en JF het uitmuntend presteer met 17 leerders (vir voorbereide toesprake en prosa lees) wat deurdring na die streeksfinaal wat op 4 Mei by Oranje Meisieskool gaan plaasvind.

Die tweede kompetisie waar JF uitgeblink het, was OppiTongAf (15-19 April 2024). Hierdie kompetisie was deur middel van ZOOM gedoen. Die uitslae spreek vir hulself: JF het 5 senior leerders gehad wat A++’e behaal het. Dit is ’n toespraak met ’n punt bo 90%. Die onvoorbereide redenaars sprekers het ook by “Die Goue Tong,” waar hulle ’n skamele výf minute voorberedingstyd het, uitstekend presteer met twee A++’e.

Op 1 Mei 2024 gaan 16 leerders JF by Witteberg by die ATKV-kompetisie verteenwoordig. Ons wens elke leerder soveel sterkte toe. Ons weet julle gaan JF se naam hoog hou.

“Voorsitter, dames en here”, hiermee sluit ek af: JF se sprekers domineer die redenaarskompetisies met hul oorredingvermoëns, goeie stemgebruik en insig in hul argumente.

Deur: Ansje Bekker